Sitjandi í svörtu grasi (Traduction Sjon)
1
Þessa nótt, sitjandi í svörtu grasinu
á milli tveggja kossa
horfum við á systur okkar, stjörnurnar
Augliti til auglitis
Börnin enn að leik í læknum
Hljóðlega, steinvölur falla af himni
blítt á hvílandi líkama okkar
Loftsteinar smjúga gegnum föt þín
Elskan mín
Hendur þínar eins og sjávarþang
Brjóst þín fiskar
Alda, haf
geymið hin dauðu
Deilið sögum ykkar
Um faðmlög, um skeljar
Látið hana aldrei hætta þessa sumartíð
2
Elskan mín, elskan mín
Hjarta mitt slær eins og kjarnakljúfur
Jarðskorpan
Orðskorpa
Seig hrauntunga af orðum
Sviti mannanna drýpur
Í árnar, í hafið, í vindinn, í leðjuna
Slagæðar og stórkostlegar bláar skipaleiðir
Sterk, sólin
Snýr aftur hvern dag og grefur sig dýpra í hold mitt
Sviti
Sviti!
Trjálauf
Og plasthafið
Mennskur sviti!
Viður, trjábörkur, kvoða
mennskur sviti
Ég berst ekki lengur um
Ég hreyfi mig ekki lengur
Ég bíð bara eftir faðmlagi flísarinnar
Tómið milli flekanna
Tómið milli líkamanna
Seigfljótandi orðin
Jörðin hallar sér ástúðlega fram og þiggur úraníumkoss frá kjarnorkuverunum
Strokur þínar ná undir húð mína
Hendur þínar grípa um bein mín
Geislavirkar sálir okkar
Brenna
Brenna
Teikn
Eindir
Samruni
Brestur
Húð mín fellur að fótum þínum
Ég er nakinn
Ég nakinn líkt og ég hafi aldrei verið til
3
Sviðin ágústjörð
Ég er með og ég er ekki með
Ég reikna dagana
Ég reikna næturnar
Hvar verður þú milli faðmlaganna?
Hálfvolg, hálfvolg
Brennandi, brennandi,
Land ágústmánaðar!